خداع بصري جامد

السلام عليكم ..

بص للصورة دي كويس ..

الراجل الهادي على اليمين ..
الراجل العصبي على الشمال ..

طاب ..قوم من على الكرسي .. ارجع للوراء مسافة 3 متر على الاقل ..يعني في طرف الحجرة المقابل .. وانظر للصروة مجددا

اتعكسوا ؟؟

الصورة دي نتاج ابحاث من جامعةجلاسجو في اسكتلندا .. وفكرتها ان كل واحدة من الصورتين في الحقيقة صورتين فوق بعض .. لكن واحدة فيها ترددات عالية والتانية تردداتها منخفضة .. فلما تكون الصورة قريبة من عينك .. عينك سوف تلاحظ الترددات العالية أكثر .. ولما تبعد الصورة عن عينيك .. فلن تلاحظ تلك الترددات .. بل تغلب الترددات المنخفضة للصورة الاخرى ..

فكرتها بسيطة .. بس ظريفة جدا

----------- تحديث -----------
الموضوع اتنشر في " بيبر" .. للي يحب يقرأها
http://cvcl.mit.edu/Papers/Schyns-Oliva99.pdf

انشئ مكان ثلاثي الابعاد من مجموعة صور

السلام عليكم ..

من فترة قصيرة اعلنت شركة مايكروسوفت عن مشروع برنامج جديد تحت الانشاء .. بصراحة جميل جدا ..
الفكرة الرئيسية منه هو ازاي ممكن تحول مجموعة صور الى مكان افتراضي ثلاثي الابعاد .. تخيل معايا انك مثلا كنت في حديقة جميلة وقمت بالتقاط مجموعة صور ... لك ولاصحابك .. طبعا هاتلاقي ان كثير من أماكن التصوير واحدة في كل الصور .. او على الاقل قريبة من بعضها ..

البرنامج بتاع مايكروسوف "فوتو سينث" .. او التخليق الصوري .. بياخد الصور المتقاربة .. ويلزقهم في بعض منشئا الاماكن التي زرتها في محيط ثلالثي الابعاد ..


بصوا .. بدون طول شرح وتفصيل .. شوف الفديوهاية دي ..
و ممكن تعمل داونلود للفيديو بريزوليونش مختلفة من هنـــا .. لكن البرنامج لسة ماخلصش ..

لكن لا زلنا في انتظاره ..

السلام عليكم

كيف تخفي تحركاتك على النت بشكل كامل

السلام عليكم ..

من فترة جربت برامج كتير الهدف منها اخفاء هوية متصفح النت ..وكانت البرامج دي كلها قائما على استخدام البروكسي سيرفر ..

قبل ما نقول يعني ايه بروكسي ..
نقول ازاي موقع النت بيفتح اصلا ..
لما سيادتك بتكتب اسم موقع وتدوس انتر .. بيقوم برنامج الانترنت اسبلورر (او فايرفوكس او اوبرا) بارسال طلب عن طريق شبكة شركة موزع الانترنت (لينك او تي اي داتا مثلا)الى السيرفر اللي متسجل عليه الموقع المطلوب .. وردا على هذا الطلب .. يقوم السيرفر بارسال رسالة كبيرة الحجم اليك .. يقوم برنامج الاكسبلورر بترجمة هذه الرسالة الى ما تره على شاشتك .. كلام وصور ..وهو ده الموقع اللي سيادتك بتشوفه

فكرة البروكسي انك بتبعت الطلب الاول الى بروكسي سيرفر وسيط .. وهذا الوسيط يتصل بالويب سيرفر (اللي عليه الموقع) ويستلم منه الرسالة الكبيرة (اللي فيها ما تراه من الموقع) ثم يعيد الوسيط تلك الرسالة اليك ..

بهذا يصعب على الويب سيرفر تتبع صاحب الطلب الاصلي ..

الا ان مفهوم البروكسي اصبح قديما نوعا ما .. وتم ايجاد بدل الحيلة الف حيلة لكسر البروكسي .. او تخطيه وتتبع الاطراف الرئيسية في الاتصال (جهازك والويب سيرفر) .. فظهرت تكنولوجيا جديدة في اخفاء شخصية مستخدم النت .. ظهر ما يسمى الطور
TOR = The Onion Router

وبدأ هذا المشروع اصلا في أحد مراكز الابحاث التابعة للجيش الامريكي ثم تحول لمشروع مفتوح المصدر .. و " نظام طور" يعتبر الجيل الثاني من ناتج تلك الابحاث ..

الفكرة باختصار هي ان كل فرد على النت يمثل بروكسي سيرفر .. يعني وسيط .. واي مستخدم يريد ارسال او استقبال طلبات من ويب سيرفر ... يتم تقسيم الرسائل .. وارسالها الى عدد كبير من الوسطاء (مستخدمي نظام طور الاخرين) .. وهؤلاء الوسطاء يرسلوت تلك القطع الى وسطاء اخرين بشكل عشوائي تماما .. حتى تتجمع الرسالة الكاملة عند الويب سيرفر .. وهكذا في طريق عودة الرسالة الكبيرة التي تحوي الموقع المراد ..

بهذا النظام المعقد .. تستفيد من الاتي:
1- شركات توزيع الانترنت (زي لينك مثلا) لا يستطيعون مراقبة تحركاتك على النت .. فكل ما سيشاهدوه هو عدد كبير من الرسائل المبعثرة في اتجاهات متعددة يستحيل تعقبها او معرفة اين ستنتهي ..
2- اصحاب المواقع الذين يضعون اكواد تعقب الزوار سيفشلون ايضا .. فهم لا يعرفون من الشخص الحقيقي الذي يفتح الموقع ..

لكن لهذا النظام عيوب، أهمها:
1- السرعة ابطأ قليلا .. لكن مش بشكل مؤذي
2- بعض المواقع التي تطلب لينك مؤمَن بشكل معين قد تفشل في الفتح وللاسف منها موقع بلوجر

تم تركيب هذا النظام "طور" على نسخة معدلة من الفايرفوكس .. وجعله برنامج واحد .. كمان اضافوا ميزة التنقل .. فالبرنامج لا يحتاج لـ " سيتاب" ..لكن ممكن وضعه على فلاش ميموري مثلا .. و استخدامه على اي جهاز بدون اي سيتاب ..

اقدم لكم برنامج TorPark المجاني .. ويمكن تحميله مباشرة من هنــــا ..

بعد تنزيل البرنامج .. ممكن تتأكد من هويتك من موقع
http://www.ip-adress.com
ده بيجيب بلدك والاي بي ..
جرب نفس الموقع باستخدام الاكسبلورر العادي ..

ستجد اختلاف في النتيجتين !

اخر ملحوظة .. البرنامج لا يحتاج لاي تظبيط في الراوتر .. او فتح اي بورتات او اي حاجة من اي نوع .. افتحه .. وهايشتغل على طول !

السلام عليكم

سييف الفيديو من يوتيوب

السلام عليكم ..

جمعت كل المعلومات في الصور التالية ..


لعلها فيها الفايدة
السلام عليكم

Cairo ICT 2007

السلام عليكم ..

من كام يوم كنت في قاعة المؤتمرات باحضر المعرض السنوي لتكنولوجيا المعلومات والاتصالات، والحقيقة انبهرت من المعروض هناك ..

عدد مهول من الشركات العالمية .. وكل واحدة عاملة بوث (مكان لعرض خدمات ومنتجات الشركة) مكلفاه الاف ان ماكانش ملايين .. ايوة ملايين .. البوث بتاع شركة اتصالات (شركة المحمول الثالثة) سمعت انها مكلفة البوث بتاعها حوالي مليون ونص دولار .. هما كتير ..بس لو شفته .. هاتصدق !

انا بادون الكلام ده ليه ؟ .. بصراحة علشان باعتبر الاحداث اللي من النوعية دي لازم الناس يهتموا بيها اكتر .. يمكن نحس على دمنا و نبدأ أو نحاول نلحق بركب التكنولوجيا ... الذي فاتنا من منتصف القرن التاسع عشر .. امتى ده ؟؟ .. بيفكرك بحاجة التاريخ ده ؟؟ .. ده تاريخ الثورة الصناعية في أوربا لما اخترعوا آلات البخار .. والقطار و كده يعني ..

المهم..
المعرض اسمه ICT =Information and Communications Technologies بيقام سنويا في قاعة المؤتمرات، الغرض منه استعراض اخر ما عند اكبر شركات الاتصالات والمعلومات في مصر والخارج (والخارج دي تحتها خطوط كتير، لان مصر تقريبا مافيهاش جديد).. كمان بيبقي فيه منتديات (forums) بتبقى عبارة عن محاضرة ويليها أسئلة ..

كل شركة بتبقى حاجزة مساحة بتعرض فيها افضل ما لديها من منتجات وخدمات .. والسنة دي كانت شركة اتصالات الاماراتية هي الافضل على الاطلاق .. فده يعتبر اول ظهور لشركة المحمول التالتة امام الجمهور المصري ..

فحسب موقع المعرض، تعتبر الخدمات/المنتجات التالية هي أهم الفرقعات:
- الاتصالات الاماراتية: الشركة التالتة للمحمول في مصر
- فودافون: خدمات الجيل الثالث للمحمول ( 3G)
- مايكروسوفت:ويندوز فيستا
- انتل : كور 2 ديو (ده بروسيسور جديد من انتل .. جامد يعني بس اسرائيلي!)
- باناسونيك: أكبر شاشة بلازمة في العالم 103 بوصة (شكلها يهبل)
- تي اي داتا مع ايه ار تي: خدمة نقل القنوات الفضائية عبر الانترنت

المعرض بيفتح من الصبح لحد الساعة 8 بليل ..
انا رحت على الساعة 6 ونص كده .. فملحقتش كتير .. كل سنة باخصص يوم كامل تقريبا للمعرض ده .. المهم .. قاعة المؤتمرات كانت ضاربة انوارها في السماء بشكل اكثر من رائع .. لدرجة ان النور كان باين من قبل ما اوصل للمكان بكتير ..



طبعا المكان من جوة هيصة وزنبليطة .. موسيقا عالية جدا .. زحمة .. ناس كتير بتتفرج على حاجات مش فاهمينها .. بس مستمتعين وخلاص ..

المفروض القيمة الحقيقية من المعرض هي المنتديات او المحاضرات اللي بتتعمل .. لكن اغلب الناس مش بيسألوا عن جداول المنتديات اصلا .. ما علينا .. اسيبكوا بقى مع حبة صور اخدتها من هناك..

دي شاشة باناسونيك البلازما 103 بوصة بالصلى عـ النبي .. تهبل .. وبـ 400 الف بس :


ودي شاشة تانية 50 بوصة بس (LCD) بـ 21 الف .. و راكب على الشاشة زي طبقة تانية شفافة فيها سينسورز .. فالشاشة بقت تشتغل كأنها Touch Screen بزيادة الف جنيه على سعرها الاصلي .. بجد انجاز جميل من باناسونيك .. والفيديو (دقيقة واحدة) ده ديمو الراجل عملهولي على جوجل ايرث .. لاحظ انه بيحرك الخريطة بصباعه .. !



اتمشيت شوية لحد ما خبطت في شركة جونيبر (Juniper).. دي بقت منافس قوي لشركة سيسكو التي طالما احتكرت اسواق الراوترز .. شركة جونيبر اجهزتها لها اداء افضل واسرع .. لاعتمادها على الهاردوير في الـ IP tables management and routing بدل من السوفتوير كما تفعل سيسكو .. ده طبعا بيخلي اجهزة جونيبر اسرع بشكل ملحوظ .. يبدو ان العالم مستعد ان يدفع المزيد لقليل من زيادة سرعة الاتصالات ..
اللي لفت نظري .. كاريكاتير رسماه جونيبر بيتريقوا فيه على انظمة سيسكو (لاحظ الموتور)


ننطلق بعيدا عن باناسونيك وجونيبر .. لنجد فودافون .. نازلة المعرض بعرض خدمات الجيل الثالث .. يعني ممكن تعمل مكالمة فيديو .. تدخل على النت .. وكده يعني ..
وزي كل سنة البوث بتاعهم جميل جدا ..


في مواجهة فودافون ... تلاقي عربية مرسيدس و متوسيكل هارلي في البوث بتاع أم نبيل ! ..


تقريبا موبينيل ماجاتش المعرض بأي حاجة غير العربية والموتوسيكل .. لا جديد كما يبدو .. لكن لازم المظهرية لشد اكبر عدد من الناس

نختم بقى بأجمل ما في المعرض .. البوث بتاع اتصالات .. انا سايبه في الاخر علشان نحلي بيه ..
اولا المكان بتاعهم اكبر حوالي 4 اضعاف من فودافون او موبينيل .. نازلين بخدمات كتير .. مش بس الجيل الثالث (3G).. وانما ايضا ( 3.5G ) .. الخدمة دي بتقدم انترنت فائق السرعة جدا ! .. بيبدأ من 1،8 ميجا بت بالثانية .. يعني اسرع من الي اس ال العادي بـ 7 اضعاف فما فوق ..
طبعا اغلب الناس لا يعنيهم هذه التفاصيل .. انما جايين يتفرجوا على حاجة حلوة .. وشركة اتصالات ماحرمتهومش برده ! ... عشرات الشباب (والشابات) منطورين في المكان ولابسين يونيفورم مكتوب عليه "اتصالات" .. مجرد منظر جميل ..
مش كده وبس .. دول عاملين زي مسرح (stage) و جايبين ناس يعملوا عروض ...ايشي جمباز وايشي لعب بالكورة .. كل ده في وسط الدخان و كثير من الموسيقا الصاخبة ..


والحاجة اللي فعلا شدت نظري .. واثارت اعجابي .. الواد اللي جايبينه يلعب بالكورة ..فعلا جامد .. الفيديوهاية طولها 4،5 دقيقة .. ماتتفوتش !



شركة اتصالات الاماراتية ليها شريك مصري ..عمل لنفسه بوث حمضان صغير جنب اتصالات .. الشريك هو هيئة البريد المصرية .. طبعا سمة النفاق لازال مستأصلة ..


كفاية بقى كده .. و السنة اللي جايا لازم العدد المهتم بالحاجات دي يبقى اكتر .. لعل يجي اليوم اللي نبقى منافسين عالميين في مجالات الاتصالات ..

ملحوظة: لو عايز تنزل الفيديو .. خش شوف ازاي

أخيرا : " قل متاع الدنيا قليل والآخرة خير لمن اتقى "

السلام عليكم

صطب ماك على جهازك .. خطوة بخطوة

السلام عليكم

عايز تشغل نظام ماك (ماكينتوش) على جهازك ؟؟ .. ايوة دلوقتي ممكن يشتغل على نظام الـ PC العادي ... بس فيه شرط في نوع البروسيسور ( انظر الخطوة رقم صفر) ..

لو انت داخل عايز تتفرج على صور .. شغال يعني .. ولو عايز تجربه بنفسك .. هاتلاقي التدوينة دي هاتسهل عليك كتير جدا ..

نبدأ مع بعض ان شاء الله ..

:: الخطوة صفر ::

لازم يكون البروسيسور بتاعك فيه خاصية معينة اسمها SSE2 أو SSE3 .. طاب و تعرف ازاي .. نزل برنامج CPUz من هنا..افتحه وشوف عند خانة ‘Instructions’ لو لاقيت اي منهم يبقى تقدر تنزل الماك عندك ..


لو مالاقيتش .. انسى انك تعرف تنزله .. وانصحك ترضى بالفرجة على الصور !

:: الخطوة 1 ::

نزل ملف التورنت من هنا .. ونزل ملف الأيزو (2،9 جيجا) باستعمال اي برنامج .. انا عن نفسي بفضل مايكروتورنت ده 170 كيلو بس ..

:: الخطوة 2 – اختياري أ ::

لو كنت هاتجرب الماك على vmware الاول ..اقرا الجزء ده قبل ما تكمل .. لو مش عايز أو مش فاهم يعني ايه vmware اساسا .. يبقى سيبك من الجزء ده بالكامل ..

Click on New Virtual Machine >> Select Custom >> Select Other >> FreeBSD >> Next.
سيفها في اي مكان .. بس راعي ان البارتيشن ده يكون في 6 جيجا مثلا فاضيين
Number of Processors: One.
RAM for VM: 512Mb.
Use Bridged Networking (or NAT)
SCSI Adapter >> LSI Logic >> Create A New Virtual Disk >> IDE >> 6GB >> Tick Allocate All Disk Space Now
يستحسن تسيف الدرايف في نفس المكان السابق علشان ما تتوهش بعد كده مين فين ؟!

:: الخطوة 2 – اختياري ب ::

لازم تعمل الخطوة دي طالما مش هاتنزل على vmware .. المهم .. احنا عايزين 6 جيجا unpartitioned .. فممكن تصغر بارتيشن باستخدام برنامج بارتيشن ماجيك مثلا .. انا مفترض ان الكلام ده مش غريب عليك ..

و بعدين تفتح الـ command prompt من الويندوز .. (Win+R >>cmd) و تكتب الاتي في الشاشة السودة .. اللي بنقول عليها (وده غلط) شاشة الدوس ..

list disk
select disk <رقم الهارد ديسك بتاعك>
create partition primary id=af

command promptدلوقتي اقفل الـ
و افتحها تاني .. و اكتب

list disk
select disk <رقم الهارد ديسك بتاعك>
list partition
select partition <رقم البارتيشن اللي سيادتك لسة عامله>
active (’set active’لو الامر ماشتغلش جرب )

الكلام الكتير ده ليه ؟؟
احنا كده عملنا بارتيشن من النوع اللي ماك بيحبه .. و خليناه اكتيف .. يعني الكمبيوتر هايبوت منه .. و هو هايعمللك منيو " قائمة" يخيرك بيها ان كنت تحب تشغل ويندوز أو ماك ..

تحذير:
1- خلي معاك ستارت اب ديسك احتياطي علشان لو حصل حاجة غلط ترجع الدرايف بتاع الويندوز أكتيف علشان تقدر تبوت ويندوز .. ده باستخدام fdisk
2- لو حبيت تعمل ريبوت في اللحظة دي الويندوز مش هاتشتغل .. اظن انت فاهم ليه.. لان البارتيشت الاكتيف هو بتاع الماك .. ولسة الماك مانزلش اصلا .. تمام ؟

:: الخطوة 3 ::

بعد تنزيل الأيزو .. احرقه على دي في دي ..

:: الخطوة 4 ::

اعمل بوت من ال دي في دي .. هايظهرلك الشاشة الرمادي دي ..اصبر شوية .. أو شويتين !


و بعدين هايسألك عن اللغة .. طبعا اختار انجليبزي .. ده لو ماكنتش بتعرف لاوندي .. انا شخصيا مش باعرف !


:: الخطوة 5 ::

كل اللي فات كان سهل .. دخلنا بقى في المهم .. بعد كده هايظهرلك ديالوج السيتاب ..ماتستعجلش و تدوس كونتينيو .. استنى شوية لحد ما البار " أو القائمة" اللي فوق تظهر .. و اختار منها كما بالصورة .. ده لاعداد الهارد بتاعك .. دي خطوة لازم تعملها صح .. و خد بالك علشان ماتبوزش حاجة من الهارد بتاعك !


لما يفتح برنامج الـ Disk Utility اختار الهارد بتاعك .. ثم اختار البارتيشن الفاضي (اللي لسة احنا عاملينه من شوية) ..

بعد ما تختار .. دوس على Erase كده هو هايمسحه .. و يعمل filesystem جديد من النوع بتاعه (Journaled MacOS) .. و بكده يبقى جاهز للانستال .. اقفل برنامج الـ Disk Utility من الزرار الاحمر (فوق على الشمال) .. ودوس كونتينيو مرتين و أكسيبت .. لحد ما توصل للصفحة دي


لازم يكون عندك الايكون المدورة دي .. ده معناه ان البارتيشن اللي كنا بنحضر في الخطوة اللي فاتت مظبوط و جاهز .. لو مالاقيتش الايكون دي .. ارجع تاني حضر بارتيشن ..

دلوقتي قوله كونتينيو ..

:: الخطوة 6 ::

اختار Custom install .. و بعدين اختار زي ما أنا عامل في الصورة .. بس طبعا اختار نوع البروسيسور بتاعك .. ولو عندك اي اضافات محتاجها .. اختارها وماتتكسفش .. بس اهم حاجة اختيار الباتش بتاع البروسيسور المظبوط .. وماتختارش اكتر من نوع !


خلاص !

اختار Install و هو هايبدأ السيتاب على طول .. طبعا ممكن تقوله skip DVD Check طالما انك واثق ان الاسطوانة سليمة .. استنى بقى شويتين حلوين –بتاع نص ساعة كده - لحد ما يخلص ..

:: الخطوة 7 ::

كده انت عديت الحتة الخطر .. وقربت على النهاية ..
بعدين هايسألك عن اللغة والبلد .. جاوب عادي .. ولما توصل لمرحلة التسجيل Registration اكتب اي حاجة برده بس ماتخليهوش يدخل على النت ويحاول يسجلك .. يعني شد سلك النت !
كمل عادي .. اختار بلدك ..اظبط الساعة ..

و أخيرا .. الماك قام !


:: الخطوة 8 ::

ادعيلي جامد قوي مع كل بووت !

السلام عليكم

نزل أوفيس 2007 دلوقتي

السلام عليكم

ياللا يا جدعان .. أونكل بيل جيتس عامل صدقة جارية!!
اوفيس 2007 لمدة شهرين مجانا .. و بسيريال من مايكروسوفت نفسها
والتنزيل من سيرفراتهم برده !

استنى .. خد(ي) الصورتين دول .. عشان ريقك يجري .. وبعدين ابدأ(ي) التنزيل

ده الوورد و الاكسل والباوربوينت ..





عشان تجيب الاوفيس..اعمل الاتي
1- ادخل هنــــا واختار أوفيس 2007 بروفشنال ..او اي حاجة انت تحبها
2- ابدأ في ملي البيانات .. قول انك من نيو يورك والرقم البريدي 12110 .. واضرب اي خيارات من عندك
3- هايظهرلك سيريال ولينكتين للداونلود .. نزل الاولى يا ريس

النسخة دي تجريبية لمدة شهرين

اكيد هايطلع حلول (كراكات) قبل ما المدة دي تخلص

اللي يعرف حل .. يقولنا