http://www.tadwen.com

يناير 24، 2007

صطب ماك على جهازك .. خطوة بخطوة

السلام عليكم

عايز تشغل نظام ماك (ماكينتوش) على جهازك ؟؟ .. ايوة دلوقتي ممكن يشتغل على نظام الـ PC العادي ... بس فيه شرط في نوع البروسيسور ( انظر الخطوة رقم صفر) ..

لو انت داخل عايز تتفرج على صور .. شغال يعني .. ولو عايز تجربه بنفسك .. هاتلاقي التدوينة دي هاتسهل عليك كتير جدا ..

نبدأ مع بعض ان شاء الله ..

:: الخطوة صفر ::

لازم يكون البروسيسور بتاعك فيه خاصية معينة اسمها SSE2 أو SSE3 .. طاب و تعرف ازاي .. نزل برنامج CPUz من هنا..افتحه وشوف عند خانة ‘Instructions’ لو لاقيت اي منهم يبقى تقدر تنزل الماك عندك ..


لو مالاقيتش .. انسى انك تعرف تنزله .. وانصحك ترضى بالفرجة على الصور !

:: الخطوة 1 ::

نزل ملف التورنت من هنا .. ونزل ملف الأيزو (2،9 جيجا) باستعمال اي برنامج .. انا عن نفسي بفضل مايكروتورنت ده 170 كيلو بس ..

:: الخطوة 2 – اختياري أ ::

لو كنت هاتجرب الماك على vmware الاول ..اقرا الجزء ده قبل ما تكمل .. لو مش عايز أو مش فاهم يعني ايه vmware اساسا .. يبقى سيبك من الجزء ده بالكامل ..


Click on New Virtual Machine >> Select Custom >> Select Other >> FreeBSD >> Next.
سيفها في اي مكان .. بس راعي ان البارتيشن ده يكون في 6 جيجا مثلا فاضيين
Number of Processors: One.
RAM for VM: 512Mb.
Use Bridged Networking (or NAT)
SCSI Adapter >> LSI Logic >> Create A New Virtual Disk >> IDE >> 6GB >> Tick Allocate All Disk Space Now
يستحسن تسيف الدرايف في نفس المكان السابق علشان ما تتوهش بعد كده مين فين ؟!


:: الخطوة 2 – اختياري ب ::

لازم تعمل الخطوة دي طالما مش هاتنزل على vmware .. المهم .. احنا عايزين 6 جيجا unpartitioned .. فممكن تصغر بارتيشن باستخدام برنامج بارتيشن ماجيك مثلا .. انا مفترض ان الكلام ده مش غريب عليك ..

و بعدين تفتح الـ command prompt من الويندوز .. (Win+R >>cmd) و تكتب الاتي في الشاشة السودة .. اللي بنقول عليها (وده غلط) شاشة الدوس ..


list disk
select disk <رقم الهارد ديسك بتاعك>
create partition primary id=af

command promptدلوقتي اقفل الـ
و افتحها تاني .. و اكتب

list disk
select disk <رقم الهارد ديسك بتاعك>
list partition
select partition <رقم البارتيشن اللي سيادتك لسة عامله>
active (’set active’لو الامر ماشتغلش جرب )


الكلام الكتير ده ليه ؟؟
احنا كده عملنا بارتيشن من النوع اللي ماك بيحبه .. و خليناه اكتيف .. يعني الكمبيوتر هايبوت منه .. و هو هايعمللك منيو " قائمة" يخيرك بيها ان كنت تحب تشغل ويندوز أو ماك ..

تحذير:
1- خلي معاك ستارت اب ديسك احتياطي علشان لو حصل حاجة غلط ترجع الدرايف بتاع الويندوز أكتيف علشان تقدر تبوت ويندوز .. ده باستخدام fdisk
2- لو حبيت تعمل ريبوت في اللحظة دي الويندوز مش هاتشتغل .. اظن انت فاهم ليه.. لان البارتيشت الاكتيف هو بتاع الماك .. ولسة الماك مانزلش اصلا .. تمام ؟

:: الخطوة 3 ::

بعد تنزيل الأيزو .. احرقه على دي في دي ..

:: الخطوة 4 ::

اعمل بوت من ال دي في دي .. هايظهرلك الشاشة الرمادي دي ..اصبر شوية .. أو شويتين !


و بعدين هايسألك عن اللغة .. طبعا اختار انجليبزي .. ده لو ماكنتش بتعرف لاوندي .. انا شخصيا مش باعرف !


:: الخطوة 5 ::

كل اللي فات كان سهل .. دخلنا بقى في المهم .. بعد كده هايظهرلك ديالوج السيتاب ..ماتستعجلش و تدوس كونتينيو .. استنى شوية لحد ما البار " أو القائمة" اللي فوق تظهر .. و اختار منها كما بالصورة .. ده لاعداد الهارد بتاعك .. دي خطوة لازم تعملها صح .. و خد بالك علشان ماتبوزش حاجة من الهارد بتاعك !


لما يفتح برنامج الـ Disk Utility اختار الهارد بتاعك .. ثم اختار البارتيشن الفاضي (اللي لسة احنا عاملينه من شوية) ..

بعد ما تختار .. دوس على Erase كده هو هايمسحه .. و يعمل filesystem جديد من النوع بتاعه (Journaled MacOS) .. و بكده يبقى جاهز للانستال .. اقفل برنامج الـ Disk Utility من الزرار الاحمر (فوق على الشمال) .. ودوس كونتينيو مرتين و أكسيبت .. لحد ما توصل للصفحة دي


لازم يكون عندك الايكون المدورة دي .. ده معناه ان البارتيشن اللي كنا بنحضر في الخطوة اللي فاتت مظبوط و جاهز .. لو مالاقيتش الايكون دي .. ارجع تاني حضر بارتيشن ..

دلوقتي قوله كونتينيو ..

:: الخطوة 6 ::

اختار Custom install .. و بعدين اختار زي ما أنا عامل في الصورة .. بس طبعا اختار نوع البروسيسور بتاعك .. ولو عندك اي اضافات محتاجها .. اختارها وماتتكسفش .. بس اهم حاجة اختيار الباتش بتاع البروسيسور المظبوط .. وماتختارش اكتر من نوع !


خلاص !

اختار Install و هو هايبدأ السيتاب على طول .. طبعا ممكن تقوله skip DVD Check طالما انك واثق ان الاسطوانة سليمة .. استنى بقى شويتين حلوين –بتاع نص ساعة كده - لحد ما يخلص ..

:: الخطوة 7 ::

كده انت عديت الحتة الخطر .. وقربت على النهاية ..
بعدين هايسألك عن اللغة والبلد .. جاوب عادي .. ولما توصل لمرحلة التسجيل Registration اكتب اي حاجة برده بس ماتخليهوش يدخل على النت ويحاول يسجلك .. يعني شد سلك النت !
كمل عادي .. اختار بلدك ..اظبط الساعة ..

و أخيرا .. الماك قام !


:: الخطوة 8 ::

ادعيلي جامد قوي مع كل بووت !

السلام عليكم

يناير 16، 2007

نزل أوفيس 2007 دلوقتي


السلام عليكم

ياللا يا جدعان .. أونكل بيل جيتس عامل صدقة جارية!!
اوفيس 2007 لمدة شهرين مجانا .. و بسيريال من مايكروسوفت نفسها
والتنزيل من سيرفراتهم برده !

استنى .. خد(ي) الصورتين دول .. عشان ريقك يجري .. وبعدين ابدأ(ي) التنزيل

ده الوورد و الاكسل والباوربوينت ..





عشان تجيب الاوفيس..اعمل الاتي
1- ادخل هنــــا واختار أوفيس 2007 بروفشنال ..او اي حاجة انت تحبها
2- ابدأ في ملي البيانات .. قول انك من نيو يورك والرقم البريدي 12110 .. واضرب اي خيارات من عندك
3- هايظهرلك سيريال ولينكتين للداونلود .. نزل الاولى يا ريس

النسخة دي تجريبية لمدة شهرين

اكيد هايطلع حلول (كراكات) قبل ما المدة دي تخلص

اللي يعرف حل .. يقولنا

** ديبو: قارئ المدونات **


السلام عليكم

أخواني وأخواتي المدونون ..

من فترة و انا بحاول احل مشكلة بتقابلني بشكل شبه يومي عندما أحاول قراءة المدونات .. غالبا ما بادخل عند منال وعلاء للتطلع لجديد المدونين .. المشكلة اني غالبا ما باتكعبل فيما لا يستحق القراءة أو ان نوعية التفكير غير محترمة أصلا .. و اتهيألي دي مشكلة ناس كتير ..

الحل السهل ان الواحد يستعمل برنامج أجريجيتور شغال على لستة من المدونات المحترمة .. و عن طريقه يستطيع قراءة ما هو جديد ومحترم بغير تضييع الوقت ..

ماطولش عليكم .. البرنامج سميته " ديبو – قارئ المدونات" .. و يتم تحميل ملف opml به بعض المدونات المحترمة والهادفة .. غير مقتصر على اتجاه معين .. لكن مقتصر على ما هو محترم! لو شايف ان فيه مدونات تستحق الاضافة .. قوللي .. ولو شايف العكس برده قوللي ..

ياريت تنزل البرنامج .. لو عجبك .. يبقى ياريت تحط اعلان ليه في مدونتك (صورة صغيرة على الجنب حجم: 150 في 195) زي اللي عندي في الجنب

لينك التنزيل: - 4،4 ميجا-
Deebo-installer.exe

كود الاعلان:

<div align="center">
<a href="http://eldeebs.blogspot.com/2006/12/blog-post_01.html">
<img border="0" src="http://files.myopera.com/eldeebs/files/Deebo_Reader_sidebarFlyer.gif" />
</a>
</div>


بعض مميزات البرنامج:
• واجهة سهلة الاستخدام (انجليزي - عربي)
• سهولة إضافة وإزالة المدونات من قائمة البرنامج
• عند وصول تدوينة جديدة تظهر بوب أب للتنبيه(مثل الماسنجر)
• استيراد وتصدير opml
• ارسال تدوينة كإيميل مباشرة من البرنامج

وإليكم بعض الصور من البرنامج:



خلاص : التدوينة خلصت .. ياريت تجربوا البرنامج بجد .. و انا مستنى اقتراحاتكم .. فدي رؤية أولية ممكن مناقشتها وتغييرها ..

السلام عليكم

برنامج مهم: قائمة مهماتي


السلام عليكم ..

ده برنامج مهم جدا .. لسة مخلص تعريبه حالا

الهدف منه تنظيم لستة المهام التي تريد القيام بها
تحديد أولويات .. وتنظيم اللستة طبقا للاولويات
شكله حلو .. سهل الاستخدام جدا ..

واليكم صورة من البرنامج


و ده لو عايز اعدل واحدة من المهمات:


ممكن ايضا تظبيط البرنامج ليبدأ مع الويندوز
كما بالصورة


البرنامج لا يحتاج سيتاب او سيريال .. مجاني !

أخيرا ::
ده لينك التنزيل
دووووووس
650 كيلو بايت

ادعولي بقى
:)

ويندوز فيستا 5600 بالصور


السلام عليكم
بعد يومين من الداونلود المستمر .. نزل أخيرا نسخة الزمالة من ويندوز فيستا
Windows Vista RC1 Build 5600 x64 Edition
و اليكم بعض الصور ..
دي طبعا أول صورة .. بعد الانستال .. و بعد ما الويندوز خد وقت كتير في البوت بتاعه ..

الحقيقة كانت بدايتي مش مفرحة .. يادوب بعد نص دقيقة برنامج الاكسبلورر بتاع الويندوز ضرب .. واداني الرسالة دي .. هي صحيح رسالة شيك أوي و بتتحرك .. لكنه يفضل أرور !


طبعا أول حاجة الواحد بيبص عليها هي الستارت مينيو ..

الزرار اللي شكله باور ده .. أول ما دسته قام عامل sleep سريع قوي .. و لما فتحت الجهاز تاني .. في كام ثانية بس كانت الويندوز قايمة ... المهم ان ده مش زرار الشات داون ! .. انما الشات داون و الريستارت و الهايبرنيت ..كل دول من السهم الصغير اللي جنب القفل ..
طاب ايه بقى القفل ..؟؟ ويندوز بدأت تقلد اللينوكس .. ده lock بحيث لما تقوم من الجهاز و مش عايز تطفيه ولا عايز حد يلعبلك فيه .. تعمله لوك !
دي صورة تانية برده للستارت مينيو ..

بعد كده بصيت على الديسك توب .. لاقيت فيه زرار جديد جنب الزرار التقليدي ShowDesktop ..

ده بالظبط زي ما بتدوس Alt+Tab للانتقال ما بين الويندوهات المفتوحة .. لما تدوس الزرار بيظهرلك برده مربع صغير في نص الشاشة كده ..


نخش بقى على My Computer ..و تلاقي سيادتك ان منظر الفولدرات اتغير تماما .. بجد .. مايكروسوفت اتنظفت قوي ..

و لما تدخل فولدر بتاع صور .. هاتلاقي ثامنيلز .. عادي .. بس اللي مش عادي انك ممكن تغير حجمهم لو عايز .. حركة صايعة برده .. تحسب لاونكل جيتس !

نيجي بقى على قصص النتوورك .. انا بالنسبة لي لما كنت باحب اشوف مين معايا على النتوورك .. كانتالويندوز اكس بي بتهنج أو بتقفش كده .. لحد ما تقوللي مين على النتوورك .. مع فيستا الوضع مختلف تماما .. زائد ان الويندوز اكتشفت ان فيه أكتر من راوتر .. العلم نور برده .. !

لو دققت في الصورة اللي فاتت هاتلاقي زرار اسمه 'Add a wireless device' .. دي خاصية جديدة لسة تحت التطوير شوية .. لكن فيستا بتدعمها .. الغرض منها انك ممكن توصل كاميرا او برنتر مثلا عن طريق الواي فاي .. و لدواعي الامن (حلوة الكلمة دي ) بيتم اضافة الجهاز على النتوورك عن طريق دنجل يو اس بي او رقم سري خاص .. ما علينا ..
جيت بقى افتح الانترنت .. طبعا نترنت اكسبلورر 7 .. شكله كويس .. بس لسة ماستعملتوش .. لكن الحمد لله .. فيه Rss اخيرا .. و تابات ..و نبات .. وكده يعني !
بسبب التنافس – العداء يعني – بين مايكروسوف و جوجل .. تلاقي سيادتك الصفحة الرئيسية في فيستا هي صفحة البحث الجديدة بتاعت مايكروسوفت

حاولت اشغل حاجة بالميديا بلاير .. الحقيقة ماعجبنيش .. بالظبط زي اخواته اللي قبل كده .. بس عمل حركة مش ظريفة .. انه دخل على النت لوحده و جابلي حبة ألبومات و أغاني جديدة .. بقى ده كلام ؟! .. كمان لاحظت ان أغلب ال Visualizations على شكل نجمة اسرائيل .. عشان كده مش هاحطله صورة .
بس اللي حلو بجد .. ال Windows Media Center ده اللي بينظملك الصور .. بيعرض دي في دي ..بيسجل من كارت الديش أو التليفزيون ..و حاجات من النوع ده ..

بعد كده .. جربت أشغل جيمز .. بالمناسبة .. انا لسة ما صطبتش كارت الشاشة ... بس على غير المتوقع اللعب اشتغلت .. جربت Fifa WorldCup 2006 و لعبة تانية عبيطة .. الاتنين اشتغلوا ..
أخر حاجة بقى .. من اعماق الكونترول بانل .. في أوبشن بيقيم أداء جهازك .. و يديله سكور .. و ممكن تقارن نفسك أونلاين .. بس مانصحكش .. لانك هاتحس ان الكومبيوتر بتاعك أخره ان بتاع الروبابيكيا يقبله كهدية ! .. كمان ممكن يعملك ريبورت عن حالة جهازك .. Reliability and Performance Monitor ده بقى هايجيبلك مصارين الكومبيوتر اللي عمرك ما شفتها ..
طيب :: ازاي تجيب سورس الويندوز فيستا .. اتهيألي هاتلاقيها على مواقع التورنت بس خد بالك من رقم النسخة .. Build 5600 ..دي اخر واحدة .. لانك هاتلاقي نسخ كتير أوي قبلها .. برده هاتحتاج سيريال .. معرفش بقى .. اتصرف انت .. انا عن نفسي .. اكمني يعني بيتا تستر في مايكروسوف .. هما اللي بعتولي لينكات التنزيل و باسوورد خاص بي ..
يا رب أكون أفادتكو .. و متعتكو ..
السلام عليكم

افتتاحية


السلام عليكم

بعد فترة من التدوين ..
لاحظت ان فيه بعض تدويناتي ليهم طابع تقني خاص غير الباقيين

مثلا بيتكلموا عن نظام تشغيل جديد او برنامج مثلا ..

فقلت أعمل مدونة خاصة بالحاجات اللي من النوع ده

و هانقل - ان شاء الله- كل التدوينات اللي من النوع التقني هنا .. و من الان فصاعدا مش هانشرهم على مدونة الديب .. لكن هايبقوا على الديب تك ان شاء الله

اتهيألي كده أوقع