http://www.tadwen.com

فبراير ٠٧، ٢٠٠٧

Cairo ICT 2007

السلام عليكم ..

من كام يوم كنت في قاعة المؤتمرات باحضر المعرض السنوي لتكنولوجيا المعلومات والاتصالات، والحقيقة انبهرت من المعروض هناك ..

عدد مهول من الشركات العالمية .. وكل واحدة عاملة بوث (مكان لعرض خدمات ومنتجات الشركة) مكلفاه الاف ان ماكانش ملايين .. ايوة ملايين .. البوث بتاع شركة اتصالات (شركة المحمول الثالثة) سمعت انها مكلفة البوث بتاعها حوالي مليون ونص دولار .. هما كتير ..بس لو شفته .. هاتصدق !

انا بادون الكلام ده ليه ؟ .. بصراحة علشان باعتبر الاحداث اللي من النوعية دي لازم الناس يهتموا بيها اكتر .. يمكن نحس على دمنا و نبدأ أو نحاول نلحق بركب التكنولوجيا ... الذي فاتنا من منتصف القرن التاسع عشر .. امتى ده ؟؟ .. بيفكرك بحاجة التاريخ ده ؟؟ .. ده تاريخ الثورة الصناعية في أوربا لما اخترعوا آلات البخار .. والقطار و كده يعني ..

المهم..
المعرض اسمه ICT =Information and Communications Technologies بيقام سنويا في قاعة المؤتمرات، الغرض منه استعراض اخر ما عند اكبر شركات الاتصالات والمعلومات في مصر والخارج (والخارج دي تحتها خطوط كتير، لان مصر تقريبا مافيهاش جديد).. كمان بيبقي فيه منتديات (forums) بتبقى عبارة عن محاضرة ويليها أسئلة ..

كل شركة بتبقى حاجزة مساحة بتعرض فيها افضل ما لديها من منتجات وخدمات .. والسنة دي كانت شركة اتصالات الاماراتية هي الافضل على الاطلاق .. فده يعتبر اول ظهور لشركة المحمول التالتة امام الجمهور المصري ..

فحسب موقع المعرض، تعتبر الخدمات/المنتجات التالية هي أهم الفرقعات:
- الاتصالات الاماراتية: الشركة التالتة للمحمول في مصر
- فودافون: خدمات الجيل الثالث للمحمول ( 3G)
- مايكروسوفت:ويندوز فيستا
- انتل : كور 2 ديو (ده بروسيسور جديد من انتل .. جامد يعني بس اسرائيلي!)
- باناسونيك: أكبر شاشة بلازمة في العالم 103 بوصة (شكلها يهبل)
- تي اي داتا مع ايه ار تي: خدمة نقل القنوات الفضائية عبر الانترنت

المعرض بيفتح من الصبح لحد الساعة 8 بليل ..
انا رحت على الساعة 6 ونص كده .. فملحقتش كتير .. كل سنة باخصص يوم كامل تقريبا للمعرض ده .. المهم .. قاعة المؤتمرات كانت ضاربة انوارها في السماء بشكل اكثر من رائع .. لدرجة ان النور كان باين من قبل ما اوصل للمكان بكتير ..



طبعا المكان من جوة هيصة وزنبليطة .. موسيقا عالية جدا .. زحمة .. ناس كتير بتتفرج على حاجات مش فاهمينها .. بس مستمتعين وخلاص ..

المفروض القيمة الحقيقية من المعرض هي المنتديات او المحاضرات اللي بتتعمل .. لكن اغلب الناس مش بيسألوا عن جداول المنتديات اصلا .. ما علينا .. اسيبكوا بقى مع حبة صور اخدتها من هناك..

دي شاشة باناسونيك البلازما 103 بوصة بالصلى عـ النبي .. تهبل .. وبـ 400 الف بس :


ودي شاشة تانية 50 بوصة بس (LCD) بـ 21 الف .. و راكب على الشاشة زي طبقة تانية شفافة فيها سينسورز .. فالشاشة بقت تشتغل كأنها Touch Screen بزيادة الف جنيه على سعرها الاصلي .. بجد انجاز جميل من باناسونيك .. والفيديو (دقيقة واحدة) ده ديمو الراجل عملهولي على جوجل ايرث .. لاحظ انه بيحرك الخريطة بصباعه .. !



اتمشيت شوية لحد ما خبطت في شركة جونيبر (Juniper).. دي بقت منافس قوي لشركة سيسكو التي طالما احتكرت اسواق الراوترز .. شركة جونيبر اجهزتها لها اداء افضل واسرع .. لاعتمادها على الهاردوير في الـ IP tables management and routing بدل من السوفتوير كما تفعل سيسكو .. ده طبعا بيخلي اجهزة جونيبر اسرع بشكل ملحوظ .. يبدو ان العالم مستعد ان يدفع المزيد لقليل من زيادة سرعة الاتصالات ..
اللي لفت نظري .. كاريكاتير رسماه جونيبر بيتريقوا فيه على انظمة سيسكو (لاحظ الموتور)


ننطلق بعيدا عن باناسونيك وجونيبر .. لنجد فودافون .. نازلة المعرض بعرض خدمات الجيل الثالث .. يعني ممكن تعمل مكالمة فيديو .. تدخل على النت .. وكده يعني ..
وزي كل سنة البوث بتاعهم جميل جدا ..


في مواجهة فودافون ... تلاقي عربية مرسيدس و متوسيكل هارلي في البوث بتاع أم نبيل ! ..


تقريبا موبينيل ماجاتش المعرض بأي حاجة غير العربية والموتوسيكل .. لا جديد كما يبدو .. لكن لازم المظهرية لشد اكبر عدد من الناس

نختم بقى بأجمل ما في المعرض .. البوث بتاع اتصالات .. انا سايبه في الاخر علشان نحلي بيه ..
اولا المكان بتاعهم اكبر حوالي 4 اضعاف من فودافون او موبينيل .. نازلين بخدمات كتير .. مش بس الجيل الثالث (3G).. وانما ايضا ( 3.5G ) .. الخدمة دي بتقدم انترنت فائق السرعة جدا ! .. بيبدأ من 1،8 ميجا بت بالثانية .. يعني اسرع من الي اس ال العادي بـ 7 اضعاف فما فوق ..
طبعا اغلب الناس لا يعنيهم هذه التفاصيل .. انما جايين يتفرجوا على حاجة حلوة .. وشركة اتصالات ماحرمتهومش برده ! ... عشرات الشباب (والشابات) منطورين في المكان ولابسين يونيفورم مكتوب عليه "اتصالات" .. مجرد منظر جميل ..
مش كده وبس .. دول عاملين زي مسرح (stage) و جايبين ناس يعملوا عروض ...ايشي جمباز وايشي لعب بالكورة .. كل ده في وسط الدخان و كثير من الموسيقا الصاخبة ..


والحاجة اللي فعلا شدت نظري .. واثارت اعجابي .. الواد اللي جايبينه يلعب بالكورة ..فعلا جامد .. الفيديوهاية طولها 4،5 دقيقة .. ماتتفوتش !



شركة اتصالات الاماراتية ليها شريك مصري ..عمل لنفسه بوث حمضان صغير جنب اتصالات .. الشريك هو هيئة البريد المصرية .. طبعا سمة النفاق لازال مستأصلة ..


كفاية بقى كده .. و السنة اللي جايا لازم العدد المهتم بالحاجات دي يبقى اكتر .. لعل يجي اليوم اللي نبقى منافسين عالميين في مجالات الاتصالات ..

ملحوظة: لو عايز تنزل الفيديو .. خش شوف ازاي

أخيرا : " قل متاع الدنيا قليل والآخرة خير لمن اتقى "

السلام عليكم

هناك ٦ تعليقات:

Unknown يقول...

ya deeb ya3ny enta 3ammal toshkoor fel kol el naas we geet 3ala Mobinil we 2olt keda....Ya3ny mesh 3agbak la el 3arabeiia wala el motosekl wala 7atta el play station elly el naas kanet betel3ab beeh wala el naas elly mashia be skating we shailaa TVs 3ala dahraa....KOooooooOOl daah mesh 3agbaaak..

Note: The videos doesn't appear,fix this problem

مش هتاخد يقول...

إلي ياعمنا فيه إيه
دي بياعه الإشاربات إلي في معرض البيع المباشر إلي موجود في أرض المعارض " السوق الحره " كانت في صاله العرض في ICT
أه والله
الست أصلا مش معاها إعداديه ومش بتفهم في التكونلوجيا ودخلت مجانا وكسبت كمان من أم نبيل
شفت بقي
وانا إتلطعت علي الباب مش عارف أدخل عشان ماعييش دعوه
وإطريت إني أدفع 20 جنيه عشان أدخل أشوف الأخبار والخدمات الجديده وخاصه من شركة إتصالات، هذا مع إني بدرس نظم معلومات وبعمل في شركه برمجيات ، لكن قالوا لك ماينعفش ، أم عويس تدخل وإنته مش هتدخل ...
بصراحه المعرض السنه دي كان زباله ، الزبالين كانوا داخليين عشان ياخدوا الهدايا ويخرجوا .
ولو أخدت بالك من خلف البوث بتاع إتصالات .

Ali Abu-Taleb يقول...

السلام عليكم يا ريس
انا كنت موجود في بوث اتصالات طول اليوم الاول واليوم التاني
ياريتنا كنا اتقابلنا :(
ياللا خير
في المعارض الجاية بقى وعليك خير :)

Ahmed Amin يقول...

OK , ICT was well organized , and large investment by there Mobile Operator companies in their booths, but the ONLY aim was to attract the largest Number of people,the do so by all means :Cars , bikes , music ,prizes whatever... they don't aim to introduce a new technology as much as they are marketing for their services.
frankly , i didn't like it , it was only a show without a meaning

غير معرف يقول...

الصورة بتاعت الشاشة الـ 103 مش باينه معايا يا معلم.. مفيش غير الخمسين بس!!
غلحقنا بيها بسرعة تاني!!

Dr. Abdullah Bahattab يقول...

السلام عليكم
نسأل الله لنا ولك التوفيق
وان شاء الله تحقق هدفك


انا احتاج وبشدة أن اعرف مخرجات الاوامر التالية لأي موديل من الانواع التاليةل لاجهزة جونيبر Juniper routers

M-series or T-series
الاوامر هي
show route
لأرى العنواين في جدول التوجيه (RT) وانا مهتم ب inet.0
show forwarding table
لأرى العناوين في جدول الدفع الموجود (MFT) بجانب RT وكلاهما موجود في Routing Engine
show pfe
لأرى العناوين الموجودة في FT الموجود في Forwarding Engine

اذا امكن وضع نتائج الاوامر في ملف أو على الاقل معرفة اعداد العناوين في كل جدول
طبعا من المفترض أن يكون عدد العناوين في RT أكثر من الذي موجود في MFT
والذي يوجد في MFT أكثر من FT

يمكن وضع النتايج في ملف ولكن يوجد تحرج من اظهار العناوين لنواحي أمنية فيمكن عمل برنامج بلغة السي وتغيير العناوين مع مراعاة أن العنوان الذي يتغير في مكان ما يجب نفسه أن يتغير في الاماكن الذي يظهر فيها بنفس العنوان الجديد فمثلا لو كان العنوان
193.30/24
وتم تغييره الى
196.20/24
فيجب تغيير كل عنوان
193.30/24 يظهر بالعنوان الجديد

ان معرفة هذه البيانات سوف تساعدني كثيييراً في البحث الذي اعمله وانا ليست عندي الامكانية للوصول لمثل هذه الاجهزة ووببيانات وعناوين حقيقية
اخوكم
د. عبدالله علي
للتواصل
abahattab@yahoo.com